« Ko ala o ʼoku talatuku-tohitukú »

Ko te fakatuʼutuʼugāue o te taʼu nei 2024 mo te kalasi 3Niue o te kolesio Mataotama o Malaʼé, neʼe fakahigoa ia ko te « Ko ala o ʼoku talatuku-tohitukú » pea ʼe huʼuga ia mo te taimi neʼe tau mai ai ʼia he hahaʼi ʼāmelika ki ʼUvea nei. Neʼe ko he faigamālie ʼaenī ke matou ʼolo o mamata i te ʼapi tāʼofi koloa fakahisitolia ki te temi o ʼāmeliká, ʼaia ʼe tuʼu i te Fenuarama i Matā-ʼUtu, pea ʼe mole ʼiloʼi hokohok mo feʼauga e te hahaʼi o totatou fenuá.
Ko Anise Leleivai, pule o te selevisi taupau kiā koloatuku o te fenuá, ʼaē neʼe ina fakahoko te mamatá i te ʼapi nei o ina fakahāhā mai ai ʼia faʼahiga koloatuku kehekehe mai te lākaga ʼaia, mai te ʼū pāki, te ʼū tokumeto tohitohi mo ʼihi atu faʼahiga koloa neʼe maʼu pē i ʼUvea nei, pē mai te hahaʼí pē lava.
Neʼe ʼuluaki vaevae mai pē e Anise te tupuʼaga foki o te faifagona mai a te kau sōlia ʼāmelika ʼaia ki hení o fakatuʼutuʼu nofoʼagatau fakafehagai ki te mafola mai a te kau sōlia saponé i te Pasifiká.
Na logo ai foki lā te lāgikoví, o tupu ai foki te heʼefealagia o tamatou fakakaku ki te ʼū mātaga kehekehe neʼe kua fakatuʼutuʼú, kae neʼe matou lava pē o kaku ki Gahi o sisio i te ʼū fakaʼiloga o te fakamalumaluʼagavaka a te kau ʼāmeliká, pea matou kaku atu ai ki Lavegahau ke matou mamata ki te malaʼevakalele ʼāfea neʼe tuʼu ai. Neʼe matou toe aʼu ki ʼUtufua, takoa ke matou sisio i he ki’i foʼi nofoʼagatau sima ʼāmelika kae neʼe mole feala hamatou kaku ki ai i te kua loloto ake leva o te taí.
Na fakahoko te ʼalu mamata nei i he ʼaho lāgikovi, kae neʼe feala pē ki te ʼū fanauakó tanatou fakakaku tonu o sisio mo ʼiloʼi he lākaga maʼuhiga o tonatou Hisitoliá